الحزمة حزمتنا وحزنتنا

2008-05-15T12:42:00.000-07:00

الحزمة حزمتنا وحزنتنا

دى مش حزمة أوامر ولا حزمة نواهى دى حزمة دواهى

حزمة خرجت علينا بيها الحكومة الالكترونية حسباها و عرفاها و فى أسواق مراقباها وضبطاها فوق دماغ الشعب قامت رمياها وخرج وزراء الابتسامة الصفرا والكلمة الماسخة يروجوا لها حتى الحاكم بأمره احمد باشا عز ملك ملوك البلاد والعباد صال وجال وصرح وقال دى حزمة توزيع الدخل ومش ممكن تمس الغلابة هو ايه اللى زاد السولار وايه يعنى ايه فى مصر بيشتغل بالسولار مفيش شوية حاجات رفاهية والله.

كل وسائل المواصلات العامة و سيارات الأقاليم والأرياف هم دول ناس محسوبة علينا إيه يعنى لما الأجرة تزيد 50% هو الفقير يركب ليه ما يمشى ده المشي رياضة والأولاد اللى بيسافروا كل يوم من قراهم الى مدارسهم مش مشكلة اللى ما عندوش مدرسة بكرة الحكومة تبنى له مدرسة واللى مالوش اهل الحكومة أهله؟

ووسائل النقل طيب والفقير بينقل ايه؟ كل حاجة زادت يا بشوات علشان النقل زاد حتى حزمة الجرجير وأهى كلها حزمة.

التاكسى زاد 50% مين يقدر يحاسبه حتى والحكومة مثبته سعر البنزين 80 لان الحكومة بتحضر لنا الحزمة التانية هو فى تانية؟ ياهووووووووووووووووه تانية وتالتة الوزير الهادئ المبتسم رشيد ابو حكومة رشيدة قال دى الاولى ولسه التقيل فى القعر هو احنا عندنا حكومة تضبط اسعار التاكسى ولا عربيات الريف المقعد عليه 4 من البشر كل اتنين على رجل بعض ولا اللى فى السيرك فين المرور؟

المرور بيدور على الحزام ومن الحزام للحزمة حزمينى ياحكومة.

كفاية فى السنة حزمة دى حزمة حطتنا فى ازمة بدون لازمة بلا تفانين و بلا حزمة دى جباية وخدناها كما العادة صامدين واقفين لكن لو جت موجة تانية من حزمك يا حكومة اكيد بتكونى انت الملومة لان الشعب ما يتحمل حزم تانى اكيد ده مستحيل مش بس صعب.